ကာလဝမ်းရောဂါ အကြောင်းသိထားရမယ့်အချက် ၃ ချက်
ကာလဝမ်းရောဂါ အကြောင်းသိထားရမယ့်အချက် ၃ ချက်
ကာလဝမ်းရောဂါ အကြောင်းသိထားရမယ့်အချက် ၃ ချက်
အခုချိန် ဝမ်းလျှောရင် ဘာပဲဖြစ်ဖြစ် ကာလဝမ်းရောဂါအနေနဲ့ သတိထားပြီးတော့ စောင့်ကြည့် ကုသသင့်ပါတယ် ။ ကာလဝမ်းရောဂါအရမ်းဆိုးရင်အသက်သေဆုံးတဲ့အထိဖြစ်သွားနိုင်ပါတယ်။
(၁) ဘာကြောင့် ကာလဝမ်းရောဂါ ဖြစ်ရတာလဲ
ဒီရောဂါက များေသာအားဖြင့် မိုးရာသီမှာအဖြစ်များပါတယ်။ Vibrio cholerae လို့ခေါ်တဲ့ ဘက်တီရီယား ရောဂါပိုးတစ်မျိုးကြောင့်ဖြစ်တာပါ။
အစားအသောက် နဲ့ရေက မသန့်ရှင်းပဲ အဲ့ဒါတွေ ထဲမှာ ရောဂါပိုးရှိတဲ့သူရဲ ့ အညစ်အကြေးတွေ ပါနေတယ်ဆိုရင် ဒီရောဂါဖြစ်လာနိုင်ပါတယ်။
တစ်ကိုယ်ရေသန့်ရှင်းရေး မရှိ ပဲ ၊ ကျန်းမာရေးနဲ့မညီညွတ်တဲ့ အလေ့အကျင့်တွေကြောင့်လည်းရောဂါပိုးကပိုမိုကူးစက်နိုင်ပါတယ်။
ရောဂါပိုးရှိတဲ့သူနဲ့ထိတွေ့ကိုင်တွယ်ရာကနေတဆင့်လည်းကူးစက်နိုင်ပါတယ်။
(၂) ဘယ်လိုကာကွယ်ရမလဲ
အခုချိန်မှာရေကိုကြိုချက်ပြီးတော့သောက်သုံးသင့်ပါတယ် ၊ ရေသန့်ကိုသောက်လည်းရပါတယ်။ စိတ်မချဘူးဆိုရင်တော့ရေသန့်ကိုကြိုချက်ပြီးတော့သောက် မယ်ဆိုလည်းရပါသေးတယ်။ကျန်းမာရေးအတွက်ဒီလို ရေသန့်ကို ကြိုေသာက်လို့ ဆိုးကျိုးမရှိပါဘူး။
အစားအသောက်တွေမကိုင်ခင်နဲ့ မစားခင်မှာလည်းလက်ကိုသေချာဆေးကြောသင့်ပါတယ်။
အစားအသောက်တွေပြင်ဆင်တဲ့အခါ သန့်ရှင်းဖို့ကလည်းအရေးကြီးပါတယ်။ ဒါကြောင့်မို့လို့ အခုလောလောဆယ်မှာရောဂါပိုးအရမ်းဆိုးနေတဲ့အတွက် အပြင်စာတွေကိုမဝယ်စားသင့်ပါဘူး။
အစားအသောက်တွေကိုချက်ပြုတ်တဲ့အခါကျက်နေအောင် ချက်ပြုတ်စားသောက်ရပါမယ်။ မကျက်တကျက် ချက်ထားတာတွေကိုလုံးဝမစားမိပါစေနဲ့။ အသီးအရွက်တွေကိုစားသုံးတော့မယ်ဆိုရင်တော့ ရေနဲ့သေချာချာဆေးရမယ်။ အသီးတွေကိုအခွံခွာပြီးမှစားသုံးရမယ်။
အိမ်သာတက်ပြီးတိုင်းလည်းလက်ကိုသေချာ ဆပ်ပြာနဲ့ရေနဲ့ သေချာဆေးသင့်ပါတယ်။
ကာလဝမ်းရောဂါအတွက် ကာကွယ်ဆေးတော့ရှိပါတယ်။ များတော့အားဖြင့်ဒီကာကွယ်ဆေးကို ကာလဝမ်းရောဂါအရမ်းပြန့်နေတဲ့အချိန်မှာထိုးပေးလေ့ရှိပါတယ်။ သက်ဆိုင်ရာကျန်းမာရေးဌာနမှာစုံစမ်းကြည့်ပါ။
(၃) အိမ်မှာဘာဆေးေသာက်ရမလဲ
ဝမ်ပိတ်ဆေး တွေ လျှောက် မသောက်ပါနဲ့ ၊ ကာလဝမ်းရောဂါဖြစ်ခဲ့ရင် ဝမ်းပိတ်ဆေးကြောင့်အခြေအနေပိုဆိုးနိုင်ပါတယ် ။
ORS ဓာတ်ဆားရည်က အဓိကပါ ။
ORS ဓာတ်ဆားရည်ကို ဝမ်း သွားပြီးတိုင်း သောက်ပေးဖို့လိုပါတယ်။ ရေဆာတိုင်းသောက်လို့လည်းရပါတယ်။
ဒီဓာတ်ဆားရေကို ရေ တစ်လီတာနဲ့ဖျော်ရပါတယ်။
အကယ်၍ ဓာတ်ဆားရည်အလွယ်တကူမရနိုင်ဘူးဆိုရင်တော့ ရေသန့် တစ်လီတာ + သကြားလက်ဖက်ရည် ဇွန်း ၆ဇွန်း + ဆား လက်ဖက်ရည်ဇွန်း တဝက် ရောဖျော်လို့ရပါတယ်။
သစ်သီးဖျော်ရည် ၊ ဆန်ပြုတ်စွပ်ပြုတ်ဟင်းရည် စတာတွေကိုလည်း များများသောက်ပေးရပါတယ်။
အာဟာရပြည့်အောင်လည်းစားသောက်နေဖို့လိုပါတယ်။
ကိုယ်ခံအားတက်လာအောင် ကောင်းကောင်းအနားယူဖို့လည်းလို့ပါတယ်။
သတိပြုရန်
⚠️
အကယ်၍ ဝမ်းလျှောတာကနေ ရေဓာတ် ခမ်းခြောက် လက္ခဏာ တွေပေါ်လာရင်ဆေးရုံဆေးခန်းကိုအမြန်သွားရပါမယ်။ ဒီလက္ခဏာတွေကဘာတွေလဲဆိုတော့ ရေအရမ်းငတ်လာမယ် ၊ အာခေါင်ခြောက်လာမယ် ၊ မျက်တွင်းချိုင့်လာမယ် ၊ ရင်တုန်လာမယ်၊ သွေးပေါင်ချိန်ကျလာမယ်၊ ဆီးသွားအရမ်းနည်းလာမယ်။
ဝမ်းလျှော တာအပြင် ဆက်တိုက်အန်မယ်၊ အဖျားအရမ်းကြီးမယ်၊ ခေါင်းတွေအရမ်းမူးမယ်၊ ဝမ်းလျှောတာ ကလည်းအရမ်းဆိုးလာမယ်။
ဒါဆိုရင်တော့ မဖြစ်မနေဆေးရုံဆေးခန်းသွားပြဖို့လိုပါတယ်။
ဆေးခန်း ၊ ဆေးရုံရောက်တဲ့အခါ ကျန်းမာရေးဝန်ထမ်းက လိုအပ်တဲ့ ထိုးဆေး ပေးတာ ၊ ပုလင်းကြီးချိတ်တာ ၊ လူနာကိုစနစ်တကျနဲ့သေချာစောင့်ကြည့်ပေးတာတွေလုပ်ပေးနိုင်ပါတယ်။
#DrZinMinTun
