ဈေးကြီးတဲ့ ဆေးတွေအစား ဈေးသက်သာတဲ့ဆေးတွေဝယ်နည်း

အခုလို ဒေါ်လာဈေး တက်နေချိန်မှာ အင်္ဂလိပ်ဆေးတွေကိုအတတ်နိုင်ဆုံး စျေးသက်သက်သက်သာနဲ့ ဘယ်လိုဝယ်သင့်သလဲဆိုရင် အရေးကြီးဆုံးအခြေခံပြီးအချက်တစ်ခုကိုသေချာသိထားဖို့လိုပါတယ်...

အဲဒါကတော့ Company name နဲ့ Generic name ကိုခွဲခြားတတ်ဖို့လိုပါတယ်

ဘာကိုပြောတာလဲဆိုတော့ company name ဆိုတာကတော့ ဆေးကိုထုတ်လုပ်တဲ့ (သို့) တင်သွင်းတဲ့ company ကနေပြီးတော့ပေးထားတဲ့ /သတ်မှတ်ထားတဲ့ ဆေးရဲ့ သီးသန့်နာမည်တခုပါ ။

ဥပမာ - Biogesic တို့ Lensen တို့ ဆိုတာက company name ဖြစ်ပြီး ဆေးကဒ်တေါထဲ တကယ်ပါတာက Paracetamol ( Generic name ) တူတူပဲ ဖြစ်ပါတယ် ။

generic name ဆိုတာကတော့ ဒီဆေးထဲမှာပါတဲ့ အင်္ဂလိပ်ဆေး ရဲ့ မူရင်းနာမည် ၊ မူရင်းဓာတုပစ္စည်းတွေကိုဆိုလိုတာပါ။

ဒါတွေကတော့ ဒေါ်လာစျေးနဲ့ဘာဆိုင်လို့ ပြောနေတာလဲဆိုရင် ကျနော်တို့ ဝယ်သောက် နေကြ တဲ့အထဲမှာ နာမည်ကြီးဆေးတွေက စျေးအရမ်းကြီးတတ်ပြီးတော့

တကယ်တမ်း အရေးကြီးတဲ့ အဓိကကျတဲ့ generic name ပါတဲ့ ဆေးတွေ ဆိုရင်တော့ ဈေးသက်သာတာတွေလည်း ရှာဝယ်လို့ရပါသေးတယ်...

များသော အားဖြင့် ဆေးကဒ်ထဲက Company name ရဲ့ အောက်နားလေးမှာ Generic name ကိုရေးထားတတ်ပါတယ် ။ ကိုယ်သောက်နေတဲ့ ဆေးက ရှာဝယ်ရခက်တယ် (သို့) ဈေးအရမ်းကြီးနေတယ်ဆိုရင် ဆေးကဒ်ထဲက Generic name အတိုင်းပဲ မေးဝယ်ပြီး သောက်ပါ ။ ဈေးပိုသက်သာပြီး တူညီတဲ့ ဆေးအမျိုးအစား ကို ရနိုင်ပါတယ် ။

နာတာရှည် ရောဂါသည်တွေက ရေရှည်ကုန်ကျစရိတ်တွေ လျှော့ချချင်ရင် ဒီနည်းကို သုံးနိုင်ပါတယ် ။ ဆေးတွေကိုတော့ ကိုယ့်သဘောနဲ့ ကိုယ် လုံးဝရပ်လိုက်တာမျိုး မလုပ်မိပါစေနဲ့ ။ ရှိနေတဲ့ ရောဂါ အရမ်းဆိုးသွားနိုင်ပါတယ် ။

ဒီနေရာမှာ တစ်ခု သတိထပ်ပေးချင်တာက အခုလို ဒေါ်လာစျေးတွေအရမ်းတက်နေချိန်မှာ အားဆေးတွေ ၊ ဗီတာမင် တွေ ကို မသောက်ချင်လည်းရပါတယ် ။

အစာအဟာရစုံစုံလင်လင် နဲ့ ပြည့်ပြည့်ဝ၀ စားသုံးပေးမယ်ဆိုရင်လည်း ခွန်အားကိုဖြစ်စေနိုင်ပါတယ်။

ဒီအားဆေးတွေကို စျေးကြီးပေးပြီးဝယ်သောက်မှ အားဖြစ်တယ်ဆိုတာ လုံးဝ မဟုတ်ပါဘူး ။ နေ့စဉ်စားသောက်နေတဲ့အထဲမှာအာဟာရဓာတ် စုံစုံလင်လင်ပါဝင်မယ်ဆိုရင်လည်းခွန်အားကိုဖြစ်စေနိုင်ပါတယ်။

အဲဒီတော့ အကျဉ်းချုပ်ရရင်

နံပါတ် ၁ - နာမည်အရမ်းကြီးတဲ့ Company ဆေးတွေအစား ၊ ဆေးကဒ်ထဲမှာပါတဲ့ အမျိုးအစားတူ ၊ အာနိသင်တူတဲ့ Generic name ပါတဲ့ ဆေးတွေကိုပဲ ရှာဖွေတတ်မယ်ဆိုရင် ကုန်ကျစရိတ် အများကြီးသက်သာသွားနိုင်ပါလိမ့်မယ်။

နံပါတ် ၂ - အရမ်းမလိုအပ်တဲ့ Multivitamin အားဆေးတွေကိုလည်း စွဲသောက် မနေဘဲနဲ့အစာအာဟာရကိုပဲ သေချာစားမယ်ဆို ရင်တော့အတိုင်းအတာတစ်ခုအထိ ထပ်ပြီးတော့ ကုန်ကျစရိတ်ကိုလျှော့ချနိုင်ပါတယ် ။

ဒေါ်လာစျေးတက်နေချိန်မှာ ဒီအချက်လေးတွေကို လိုက်နာနိုင်မယ်ဆိုရင် ဈေးသက်သက်သာသာနဲ့ ကိုယ်တကယ်ဖြစ်နေတဲ့ရောဂါအတွက် ဆေးဝါးလည်းဝယ်သောက် ရသလို မလိုအပ်တဲ့နေရာမှာကုန်ကျစရာမလိုတော့ဘူးပေါ့။

Dr Zin Min Tun